****هل توجد صداقة حقيقة الان؟****

السلام عليكم ورحمة الله وبركاتة
فى البداية احب اشكر ريماس على الموضوع الجميل دة لأن حقيقى دة موضوع مهم جدا وأحب طبعا ان اشترك فية برأيى واتمنى ان يكون رأيى ذو قيمة . اية الكلام الجامد اللى انا بقولة دة انا باخطب ولا اية . هههههههههههههه

المهم الصداقة دلوقت من رأيى بقت للأسف مجرد مصلحة وقتية وبمجرد ان المصلحة دى تنتهى خلاص كلمة الصداقة انا مش عايز اكون متشائم بس دة للأسف الواقع المر انا عن نفسى بحب جدا الصداقة وبحترمها واقدسها جدا لكن المشكلة فى الناس نفسها لأن طابع المصلحة اصبح غالب على اى شىء تانى ودى كانت عن تجربة شخصية انا مريت بيها قبل كدة واتخدعت جدا فى صديقى اللى كان المفروض انة صديق بمعنى الكلمة احنا كنا فى فترة من الفترات اكل - شرب - نوم فى بعض الاوقات مع بعض كنا اكتر من مجرد اخوات لبعض لكن للأسف بمجرد دخول البنت فى علاقتنا تنتهى الصداقة لمجرد انى اكسب ود بنت للأسف ماكنش يعرف معنى صداقة حقيقية وبالتالى انا قلبت طبعا علاقتى ليه من صداقة حقيقية الى مجرد اصحاب وخلاص عادى يعنى ( وفية اغنية جميلة قوى كانت قريبة من الموقف اللى انا بحكية دة اسمها يومينهم للهضبة عمرو دياب من البوم نور العين اصدار 1996 لشركة عالم الفن كلمات مجدى النجار الحان الهضبة عمرو دياب وتوزيع حميد الشاعرى مهندس صوت ياسر انور ياريت تسمعوها جميلة جدا ماتستغربوش من كم المعلومات دى لأنى بجد مدمن عمرو دياب لدرجة أنى رزقت بولد عندة سنة واربع شهور اسمه طبعا عمرو )الدنيا مش هتقف على حد والا كانت وقفت على وفاة الرسول الكريم محمد صلى الله علية وسلم
انا طبعا اتخدعت فى صاحبى دة ساعتها جدا لكن ماوقفتش كتير عند اللى حصل دة بالعكس انا كسبت نفسى فى الاول والاخر وانا الحمد لله بفضل الله اعرف يعنى اية صداقة ويعنى اية اقدر اقف جنب صديقى واساعدة على أد ما أقدر والحمد لله انا ليا 2 من اعز اصدقائى حقيقى بجد اللى لو طلبت حاجة من اى حد منهم يقدر يعملها ميتاخرش عنى ابدا ودة لسبب بسيط جدا لانى عمرى ما أتاخر عن أى حد منهم فى اى موقف او مشكلة اقدر اساعده فيها عمرى ما أتأخر ابدا لدرجة ان بيحصل مشاكل مع زوجتى بسبب قوة علاقتى دى بأصدقائى لدرجة انى اوقات كتير باجى على حساب نفسى لصالح اصدقائى
لازم نتفق ان الصديق مهم جدا فى حياتنا بس الاهم انة يكون صديق حقيقى بمعنى الكلمة انا بعتبر ان اهمية وجود الصديق فى حياتى على نفس درجة اهمية وجود زوجتى فى حياتى وعلى نفس درجة اهمية وجود الام والاب فى حياتى دة رأيى الشخصى
معايير اختيار الصديق متباينة من شخص لاخر لان هية بتختلف على حسب شخصية و ثقافة الشخص نفسة يعنى مش مهم بالنسبة لى الحالة الاجتماعية غنى او فقير مش مهم
مش لازم يكون معاه تعليم عالى مثلا لاء عادى ممكن يكون تعليمة دبلوم او ثانوى بس راجل فى مواقفة
يعنى مثلا على سبيل المثال وليس الحصر : -
1 - لازم يكون صديقى اهل ثقة فية اقدر ادخلة بيتى وانا مطمن انة مش هايبص لزوجتى دى حاجة مهمة جدا فى الزمن اللى احنا فية كل يوم اقرأ فى الاخبار اليومية حالات خيانة زوجية دى اكبر خطر فى حياتنا
2 - لازم يكون بيخاف عليا وبيحنى من قلبة مش عشان مصلحة والسلام ودة مش بالكلام لاء لأنى اوقات كتير مريت بمواقف وكنت الاقى صديقى اول واحد جنبى وبالمناسبة اصدقائى دول ( محمد سمير - محمد بدوى ) والاقرب لقلبى محمد سمير
3 - لازم يكون صديقى دة عارف معنى كلمة صداقة
انا بصراحة بمجرد انى احكى لصديقى ( محمد سمير ) عن اى حاجة مضايقانى او مشكلة بتقابلنى برتاح ودة مش تقليل من اهمية وجود زوجتى فى حياتى لكن انا مؤمن جدا ان صديقى دة بيكلمنى وبيفكر بعقلة غير زوجتى بتتكلم و بتفكر بعقلها وعاطفتها عشان كدة رأيى صديقى أهم من رأيى زوجتى ودة من وجهه نظرى . وطبعا ماينفعش أقول كدة لزوجتى ههههههههههههههههههههههه
4 - ان يكون لدى صديقى قدر معقول من الخبرة فى الحياة لان دى مهمه جدا حتى يكون رأية على ارض الواقع يعنى مش عايش فى جو ان الحياة بقى لونها بمبى
اسف على الاطالة وارجو ان يكون كلامى افادكم ولو بنسبة 1 % .
والسلام عليكم ورحمة الله وبركاتة.

انـــا معاك فى وجهة نظرك دى بنسبة مليون % واتمنى نكون اصدقاء
ليا طلب ممكن اشارك بصورتى فى الـ profile بتاعى معاكم
وشكرا على الاغنية الجميلة اوى دى